ಫರಿದಾಬಾದ್, 10 ನವೆಂಬರ್ (ಹಿ.ಸ.) :

ಆ್ಯಂಕರ್ : ದೆಹಲಿ, ಹರಿಯಾಣ ಮತ್ತು ಜಮ್ಮು-ಕಾಶ್ಮೀರ ಪೊಲೀಸರ ಜಂಟಿ ಕಾರ್ಯಾಚರಣೆಯಲ್ಲಿ ಹರಿಯಾಣದ ಫರಿದಾಬಾದ್ ಜಿಲ್ಲೆಯ ಧೌಜ್ ಗ್ರಾಮದಲ್ಲಿ ಭಯೋತ್ಪಾದಕ ಡಾ. ಮುಜಮ್ಮಿಲ್ ನನ್ನು ಬಂಧಿಸಲಾಗಿದೆ.

ಆತನಿಂದ ಅಪಾರ ಪ್ರಮಾಣದ ಸ್ಫೋಟಕ ವಸ್ತುಗಳು ಮತ್ತು ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಫರಿದಾಬಾದ್ ಪೊಲೀಸ್ ಆಯುಕ್ತ ಸತ್ಯೇಂದ್ರ ಕುಮಾರ್ ಗುಪ್ತಾ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಡಾ. ಮುಜಮ್ಮಿಲ್ ಫರಿದಾಬಾದ್‌ನ ಅಲ್ಫಾಲಾ ವಿಶ್ವವಿದ್ಯಾಲಯದಲ್ಲಿ ಉಪನ್ಯಾಸಕರಾಗಿದ್ದು, ಕಳೆದ 10 ದಿನಗಳ ಹಿಂದೆ ಬಂಧಿತನಾಗಿದ್ದ. ವಿಚಾರಣೆ ಬಳಿಕ ಅವನ ಬಾಡಿಗೆ ಮನೆಯಲ್ಲಿ ಶೋಧ ನಡೆಸಿದಾಗ, 360 ಕಿಲೋಗ್ರಾಂ ಅಮೋನಿಯಂ ನೈಟ್ರೇಟ್ ಎಂದು ನಂಬಲಾದ ರಾಸಾಯನಿಕ ವಸ್ತು ಪತ್ತೆಯಾಗಿದೆ.

ಪೊಲೀಸರು ಅಲ್ಲಿಂದ ಒಂದು ಫಿರಂಗಿ-ತಾಮ್ರ ರೈಫಲ್, ಐದು ಮ್ಯಾಗಜೀನ್‌ಗಳು, ಒಂದು ಪಿಸ್ತೂಲ್, ಹಾಗೂ ದೊಡ್ಡ ಪ್ರಮಾಣದ ಮದ್ದುಗುಂಡುಗಳನ್ನು ವಶಪಡಿಸಿಕೊಂಡಿದ್ದಾರೆ. ಜೊತೆಗೆ ಎಂಟು ದೊಡ್ಡ ಮತ್ತು ನಾಲ್ಕು ಸಣ್ಣ ಸೂಟ್‌ಕೇಸ್‌ಗಳು, ಒಂದು ಬಕೆಟ್, ಬ್ಯಾಟರಿಯೊಂದಿಗೆ ಟೈಮರ್, ರಿಮೋಟ್ ಕಂಟ್ರೋಲ್, ವಾಕಿ-ಟಾಕಿ ಸೆಟ್, ವಿದ್ಯುತ್ ತಂತಿಗಳು ಮತ್ತು ಇತರ ಸಾಧನಗಳು ಕೂಡ ಪತ್ತೆಯಾಗಿದೆ.

ಪೊಲೀಸ್ ಆಯುಕ್ತರ ಪ್ರಕಾರ, ಈ ಕಾರ್ಯಾಚರಣೆಯಲ್ಲಿ ಒಟ್ಟು ಇಬ್ಬರು ಭಯೋತ್ಪಾದಕರು ಬಂಧಿತರಾಗಿದ್ದಾರೆ — ಡಾ. ಮುಜಮ್ಮಿಲ್ ಅವರನ್ನು ಫರಿದಾಬಾದ್ ಪೊಲೀಸರು ಬಂಧಿಸಿದ್ದು, ಆದಿಲ್ ಅಹ್ಮದ್ ನನ್ನು ಜಮ್ಮು-ಕಾಶ್ಮೀರ ಪೊಲೀಸರು ಉತ್ತರ ಪ್ರದೇಶದ ಸಹರಾನ್‌ಪುರನಿಂದ ಬಂಧಿಸಿದ್ದಾರೆ. ಆದಿಲ್ ಅಹ್ಮದ್ ಕಾಶ್ಮೀರದ ಅನಂತನಾಗ್‌ನ ನಿವಾಸಿಯಾಗಿದ್ದಾನೆ.

ತನಿಖೆಯ ವೇಳೆ ಆದಿಲ್ ಅಹ್ಮದ್ ಫರಿದಾಬಾದ್‌ನಲ್ಲಿ ಸ್ಫೋಟಕ ವಸ್ತುಗಳನ್ನು ಸಂಗ್ರಹಿಸಿದ್ದಾಗಿ ಒಪ್ಪಿಕೊಂಡಿದ್ದು, ಅವರ ಮಾಹಿತಿಯ ಮೇರೆಗೆ 14 ಚೀಲಗಳ ವಸ್ತುಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ಆದರೆ, ಪೊಲೀಸ್ ಆಯುಕ್ತರು ಆರ್‌ಡಿಎಕ್ಸ್ ಅಥವಾ ಎಕೆ-47 / ಎಕೆ-56 ರೈಫಲ್‌ಗಳ ಪತ್ತೆಯ ವಿಚಾರವನ್ನು ನಿರಾಕರಿಸಿದ್ದಾರೆ. ಅವರು “ರಾಷ್ಟ್ರೀಯ ಭದ್ರತೆ ಮತ್ತು ಮುಂದುವರೆದ ತನಿಖೆಯ ಹಿತಾಸಕ್ತಿಯನ್ನು ಗಮನದಲ್ಲಿಟ್ಟುಕೊಂಡು ಎಲ್ಲ ವಿವರಗಳನ್ನು ಈಗ ಬಹಿರಂಗಪಡಿಸಲು ಸಾಧ್ಯವಿಲ್ಲ” ಎಂದು ಸ್ಪಷ್ಟಪಡಿಸಿ. ಬಾಡಿಗೆ ಮನೆಯಲ್ಲಿ ವಾಸವಿದ್ದ ಮನೆ ಮಾಲೀಕರನ್ನೂ ವಿಚಾರಣೆಗೊಳಪಡಿಸಲಾಗಿದೆ ಎಂದು ತಿಳಿಸಿದರು.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa