ನವದೆಹಲಿ, 12 ನವೆಂಬರ್ (ಹಿ.ಸ.) :

ಆ್ಯಂಕರ್ : ಆಚಾರ್ಯ ಕೃಪಲಾನಿ ಸ್ಮಾರಕ ಟ್ರಸ್ಟ್‌ನ ವತಿಯಿಂದ ಮಂಗಳವಾರ ದೆಹಲಿಯಲ್ಲಿ ‘ಆಚಾರ್ಯ ಕೃಪಲಾನಿ ಸ್ಮಾರಕ ಉಪನ್ಯಾಸ–2025’ ಆಯೋಜಿಸಲಾಯಿತು. ಸ್ವಾತಂತ್ರ್ಯ ಹೋರಾಟಗಾರ ಮತ್ತು ಗಾಂಧಿವಾದಿ ಚಿಂತಕ ಆಚಾರ್ಯ ಜೆ.ಬಿ. ಕೃಪಲಾನಿ ಅವರ ಸ್ಮರಣಾರ್ಥ ನಡೆದ ಈ ಉಪನ್ಯಾಸದ ವಿಷಯ “ತುರ್ತು ಪರಿಸ್ಥಿತಿಯ ಸಮಯದಲ್ಲಿ ಆಚಾರ್ಯ ಜೆ.ಬಿ. ಕೃಪಲಾನಿ” ಆಗಿತ್ತು.

ಕಾರ್ಯಕ್ರಮದ ಮುಖ್ಯ ಅತಿಥಿಯಾಗಿ ಮಾಜಿ ಸಂಸದ ಕೆ.ಸಿ. ತ್ಯಾಗಿ ಭಾಗವಹಿಸಿ ದೀಪ ಬೆಳಗಿಸಿದರು. ಹಿರಿಯ ಪತ್ರಕರ್ತ ರಾಮ್ ಬಹದ್ದೂರ್ ರೈ ಉಪನ್ಯಾಸದ ಅಧ್ಯಕ್ಷತೆಯನ್ನು ವಹಿಸಿದರು. ಈ ಸಂದರ್ಭದಲ್ಲಿ “ಚಾದರಿಯಾ ಜಿನಿ ರೇ ಜಿನಿ…” ಸೇರಿದಂತೆ ಎರಡು ಭಾವಗೀತೆಗಳನ್ನು ಪ್ರಸ್ತುತಪಡಿಸಲಾಯಿತು.

ಕೆ.ಸಿ. ತ್ಯಾಗಿ ಮಾತನಾಡಿ, “ಆಚಾರ್ಯ ಕೃಪಲಾನಿ ಅಧಿಕಾರದ ಮುಂದೆ ತಲೆಬಾಗದ ಧೀರ ನಾಯಕರು. ತುರ್ತು ಪರಿಸ್ಥಿತಿಯ ಸಮಯದಲ್ಲಿ ಪ್ರಜಾಪ್ರಭುತ್ವವನ್ನು ರಕ್ಷಿಸಲು ಅವರು ಧೈರ್ಯದಿಂದ ಹೋರಾಡಿದರು. ಆ ಹೋರಾಟದ ಬೆಲೆಯಾಗಿ ಅವರು ಜೈಲಿನ ಬದುಕನ್ನೂ ಅನುಭವಿಸಿದರು,” ಎಂದು ನೆನಪಿಸಿದರು.

ಅಧ್ಯಕ್ಷರಾದ ರಾಮ್ ಬಹದ್ದೂರ್ ರೈ, ತುರ್ತು ಪರಿಸ್ಥಿತಿಯ ಕಾಲದಲ್ಲಿ ಪತ್ರಿಕಾ ಸ್ವಾತಂತ್ರ್ಯಕ್ಕಾಗಿ ಕೃಪಲಾನಿಯವರ ಹೋರಾಟವನ್ನು ಉಲ್ಲೇಖಿಸಿ, “ಅವರು ನೈತಿಕ ರಾಜಕಾರಣದ ಜೀವಂತ ಸಂಕೇತವಾಗಿದ್ದರು,” ಎಂದು ಹೇಳಿದರು.

ಆಚಾರ್ಯ ಕೃಪಲಾನಿ ಸ್ಮಾರಕ ಟ್ರಸ್ಟ್ ಆಯೋಜಿಸಿದ ಈ ಉಪನ್ಯಾಸದ ಉದ್ದೇಶ, ಆಚಾರ್ಯರ ಆದರ್ಶಗಳು ಮತ್ತು ತತ್ವಗಳನ್ನು ಹೊಸ ಪೀಳಿಗೆಗೆ ಪರಿಚಯಿಸುವುದಾಗಿದೆ ಎಂದು ಟ್ರಸ್ಟ್ ಪ್ರತಿನಿಧಿಗಳು ತಿಳಿಸಿದರು.

ಈ ಕಾರ್ಯಕ್ರಮದಲ್ಲಿ ಶಿಕ್ಷಣತಜ್ಞರು, ರಾಜಕಾರಣಿಗಳು, ಪತ್ರಕರ್ತರು ಹಾಗೂ ಸಾಮಾಜಿಕ ಕಾರ್ಯಕರ್ತರು ಸೇರಿದಂತೆ ಹಲವು ಗಣ್ಯರು ಹಾಜರಿದ್ದರು.

ಸ್ವಾತಂತ್ರ್ಯ ಹೋರಾಟದ ಪ್ರಮುಖ ನಾಯಕನಾಗಿದ್ದ ಆಚಾರ್ಯ ಜೆ.ಬಿ. ಕೃಪಲಾನಿ, 1946ರಲ್ಲಿ ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್‌ನ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದರು. ಆಗಸ್ಟ್ 15, 1947ರಂದು ಭಾರತ ಸ್ವಾತಂತ್ರ್ಯ ಪಡೆದಾಗ ಅವರು ಕಾಂಗ್ರೆಸ್ ಅಧ್ಯಕ್ಷರಾಗಿದ್ದರು ಎಂಬುದು ಇತಿಹಾಸದ ಮಹತ್ವದ ಅಧ್ಯಾಯ. ವಯೋವೃದ್ಧರಾಗಿದ್ದರೂ ತುರ್ತು ಪರಿಸ್ಥಿತಿಯ ಕಾಲದಲ್ಲಿ ಅವರು ಪ್ರಜಾಪ್ರಭುತ್ವದ ಪರ ಹೋರಾಡಿ ಕಾರಾಗೃಹವಾಸ ಅನುಭವಿಸಿದ್ದರು.

ಆಚಾರ್ಯ ಕೃಪಲಾನಿಯವರ ಜೀವನ ನೈತಿಕತೆ, ತತ್ವಬದ್ಧತೆ ಮತ್ತು ಪ್ರಜಾಪ್ರಭುತ್ವ ಮೌಲ್ಯಗಳ ಜೀವಂತ ಉದಾಹರಣೆಯಾಗಿದ್ದು, ಅವರ ನಿಲುವುಗಳು ಇಂದಿಗೂ ಭಾರತೀಯ ರಾಜಕೀಯಕ್ಕೆ ಸ್ಫೂರ್ತಿಯಾಗಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa