व्यापार

Blog single photo

ಥಾಮಸ್ ಕುಕ್ ದಿವಾಳಿ ಬಳಿಕ ಫಾರ್ ಎವರ್ 21 ಕಂಪನಿಯೂ ದಿವಾಳಿ

30/09/2019


ವಾಷಿಂಗ್ಟನ್, ಸೆ.30 (ಹಿ.ಸ) -  ಪ್ರತಿಷ್ಠಿತ ಟ್ರಾವೆಲ್ ಬ್ರಾಂಡ್ ಥಾಮಸ್ ಕುಕ್ ಕಂಪನಿ ದಿವಾಳಿಯಾದಾಗಲೇ ಬಾರಿ ಸುದ್ದಿಯಾಗಿತ್ತು. ಇದೀಗ ಅದಕ್ಕೆ ಮತ್ತೊಂದು ಸೇರ್ಪಡೆ ಎಂಬಂತೆ ಕಡಿಮೆ ಬೆಲೆಗೆ ಹೆಸರಾದ ಜನಪ್ರಿಯ ಫ್ಯಾಶನ್ ಬ್ರಾಂಡ್ “ಫಾರ್ ಎವರ್ 21” ಕೋರ್ಟ್ ಗೆ ಚಾಪ್ಟರ್ 11ರ ಪ್ರಕಾರ ದಿವಾಳಿಯಿಂದ ರಕ್ಷಣೆ ಕೋರಿ (ಉದ್ಯಮ ಪುನಶ್ಚೇತನ) ಅರ್ಜಿ ಸಲ್ಲಿಸಿದೆ.  ಲಾಸ್ ಏಂಜಲೀಸ್ ಮೂಲದ “ಫಾರ್ ಎವರ್ 21” ಫ್ಯಾಶನ್ ಕಂಪನಿ 178 ಮಳಿಗೆಗಳನ್ನು ಬಂದ್ ಮಾಡುವುದಾಗಿ ತಿಳಿಸಿದೆ. ಈ ಕಂಪನಿ 57 ದೇಶಗಳಲ್ಲಿ 800 ಮಳಿಗೆಗಳನ್ನು ಹೊಂದಿದೆ ಎಂದು ವರದಿಯಾಗಿದೆ.  ಅಮೆರಿಕದಲ್ಲಿರುವ ಫಾರ್ ಎವರ್ 21 ಮಳಿಗೆಗಳ ಮೌಲ್ಯವನ್ನು ಹೆಚ್ಚಿಸಲು ಹೆಚ್ಚು ನಿಗಾ ವಹಿಸಲಾಗುತ್ತಿದ್ದು, ಅಂತಾರಾಷ್ಟ್ರೀಯ ಪ್ರದೇಶಗಳಲ್ಲಿ ಇರುವ ಕೆಲವು ಮಳಿಗೆಗಳನ್ನು ಮುಚ್ಚಲಾಗುವುದು ಎಂದು ಕಂಪನಿ ಪ್ರಕಟಣೆ ತಿಳಿಸಿದೆ.  ಅಂತಾರ್ಜಾಲ ತಾಣದ ಇ-ಮಾರುಕಟ್ಟೆಯಿಂದಾಗಿ ಮಾರಾಟದಲ್ಲಿ ತೀವ್ರ ಕುಸಿತ ಕಾಣುತ್ತಿರುವುದಾಗಿ ಹೇಳಿರುವ ಫಾರ್ ಎವರ್ 21 ದಿವಾಳಿಯಿಂದ ರಕ್ಷಣೆ ಕೋರಿ ಅರ್ಜಿ ಸಲ್ಲಿಸಿದೆ.  ಈಗಾಗಲೇ ಪೇ ಲೆಸ್ ಶೂಸೋರ್ಸ್ ಮತ್ತು ಚಾರ್ಲೊಟ್ಟ ರುಸ್ಸೆ ಕಂಪನಿ ದಿವಾಳಿಯಿಂದ ಮುಚ್ಚಿದೆ. ಫಾರ್ ಎವರ್ 21 ಫ್ಯಾಶನ್ ಕಂಪನಿ ನೆಚ್ಚಿಕೊಂಡಿದ್ದ ಸಾಂಪ್ರದಾಯಿಕ ಚಿಲ್ಲರೆ ಮಾರಾಟಗಾರರು ಭಾರಿ ನಷ್ಟಕ್ಕೀಡಾಗಿದ್ದಾರೆ. ಅಮೆರಿಕದಲ್ಲಿರುವ ಸುಮಾರು 8,558 ಚಿಲ್ಲರೆ ಮಾರಾಟಗಾರರು ತಮ್ಮ ಅಂಗಡಿಗಳನ್ನು ಬಂದ್ ಮಾಡುವುದಾಗಿ ಘೋಷಿಸಿದ್ದಾರೆ.
ಜಾಗತಿಕ ಸಂಶೋಧನೆ ಪ್ರಕಾರ,  2019ರ ಅಂತ್ಯದೊಳಗೆ ಅಮೆರಿಕದಲ್ಲಿ ಸುಮಾರು 12 ಸಾವಿರ ಮಳಿಗೆಗಳು ಮುಚ್ಚಲಿವೆ ಎಂದು ಹೇಳಿದೆ. ಫಾರ್ ಎವರ್ 21 1984ರಲ್ಲಿ ಅಮೆರಿಕದ ಫಾಸ್ಟ್ ಫ್ಯಾಶನ್ ಸಂಸ್ಥೆ ಸ್ಥಾಪನೆಯಾಗಿತ್ತು. ಲಾಸ್ ಏಂಜಲೀಸ್, ಕ್ಯಾಲಿಫೋರ್ನಿಯಾ ಮತ್ತು ಅಮೆರಿಕದಲ್ಲಿ ಕೇಂದ್ರ ಕಚೇರಿಗಳನ್ನು ಹೊಂದಿತ್ತು. ಡೂ ವನ್ ಚಾಂಗ್, ಜಿನ್ ಸೂಕ್ ಚಾಂಗ್ ಈ ಕಂಪನಿಯನ್ನು ಸ್ಥಾಪಿಸಿದ್ದರು.


 
Top